Ի դեմս «Ֆրեշ», «Սթար» և «Զովք» սուպերմարկետների ցանցերի` այսուհետ հայ սպառողներին հնարավորություն կընձեռվի գործի դնել իրենց բնապահպանական գիտակցությունը` պոլիէթիլենային տոպրակների փոխարեն գործածելով թղթե տոպրակներ: Ընդամենը 50 դրամով ամեն ոք կարող է ապացուցել, որ ինքը բնապահպանական առումով խելամիտ սպառող է: Այս փոքր գումարը, իրականում, կարող է առավել նպաստավոր և կանաչ ապագայի համար մեծ փոփոխության առիթ լինել:

Ներկայումս պոլիէթիլենային տոպրակների գերսպառումը, որը հարյուրավոր տարիներ կպահանջի` քայքայվելու համար, բնապահպանական լուրջ վնասների պատճառ է դառնում:

Շատ երկրներում այս տոպրակների օգտագործումն արդեն իսկ արգելված է օրենքով, կամ էլ հաճախորդները պետք է վճարեն դրա համար, բայց հայաստանյան հաճախորդներին ցանկացած խանութում կամ սուպերմարկետում տրվում է միանգամայն անվճար: Պոլիէթիլենային տոպրակները սովորաբար օգտագործվում են ընդամենը մեկ անգամ ու դեն նետվում:

Այսպիսով, ծառերի ու մարգագետինների վրա, գետերում և այգիներում կուտակված միլիոնավոր պոլիէթիլենային տոպրակները ոչ միայն աչքի են զարնում, այլև տնտեսական վնաս են հասցնում` խցանելով ջրատարները, ընտանի ու եզակի վայրի կենդանիների վերացման պատճառ դառնալով, ինչպես նաև կուտակվելով հայաստանյան քաղաքներում և մարզային բնակավայրերում:

Վայրի բնության և մշակութային արժեքների պահպանման հիմնադրամը ՎիվաՍել-ՄՏՍ-ի և այլ գործընկերների հետ համատեղ հայաստանյան սուպերմարկետներին թղթե տոպրակներով ապահովելու նախաձեռնությամբ ցանկանում է բնապահպանական գիտակցությամբ առաջնորդվող սպառողներին առաջին անգամ հնարավորություն տալ` դրսևորելու իրենց քաղաքացիական պատասխանատվությունը`նախապատվություն տալով թղթե տոպրակներին:

Թղթե տոպրակների ծրագիրը մեկնարկել է երևանյան բոլոր «Ֆրեշ» սուպերմարկետներում «Կանաչ սերունդ» մեկամսյա քարոզարշավի շրջանակում, սակայն ակցիան կշարունակվի ողջ տարին: «Ֆրեշ» սուպերմարկետների ցանցն առաջին նման ցանցն էր, որը միացավ թղթե տոպրակների ծրագրին` այդպիսով դառնալով բնապահպանական կորպորատիվ սոցիալական պատասխանատվության ոլորտի առաջատարը:

Հիմնադրամը նախաձեռնությանը միանալու կոչ է արել նաև «ՍԱՍ» և «Մոսկվիչկա» սուպերմարկետների ցանցին և դեռևս սպասում է պատասխանի:

Ծրագրի մասին հանրությանն իրազեկելու համար «Ֆրեշ» սուպերմարկետներում ապրիլին տեղի կունենան բնապահպանական միջոցառումներ: Հիմնադրամի «Արևորդի» էկո-ակումբների պատանի սաները սուպերմարկետի հաճախորդներին կբաժանեն ծաղկի սերմեր և թռուցիկներ` տեղեկացելու համար էկոլոգիապես նպաստավոր թղթե տոպրակներ ձեռք բերելու նոր հնարավորության մասին: