ԳԼԽԱՎՈՐ
Eng.Հայ.
 
SunChild Festival  Վերջին նորությունները  Առաջիկա միջոցառումներ      Վերջին վիդեո նյութերը

“Կանաչ Սերունդ-2010” քարոզարշավն ընթանում է հագեցած միջոցառումներով


21.04.2010 19:48 Age: 5 տարի

Ապրիլի 20-ին Արմեինա-Մարիոթ հյուրանոցի Աշոտ Երկաթ սրահում կայացած մամլո ասուլիսի ընթացքում  Վայրի բնության և մշակութային արժեքների պահպանման հիմնադրամի նախագահ Ռուբեն Խաչատրյանը լրագրողներին ներկայացրեց  “Երիրի օրվա” շրջանակներում իրականացվող միջոցառումները:  Ասուլիսին ներկա էին նաև ՎիվաՍել-ՄՏՍ ընկերության նախագահ Ռալֆ Յիրիկյանը, Ցեղասպանության թանգարան-ինստիտուտի տնօրեն Հայկ Դեմոյանը, ովքեր իրենց հերթին  ներկայացրեցին հիմնադրամի հետ իրականացվող համատեղ ծրագրերը:

Վայրի բնության և մշակութային արժեքների պահպանման հիմնադրամը ՎիվաՍել-ՄՏՍ ընկերության հետ համատեղ Հայաստանում նախաձեռնում է «Կանաչ սերունդ- 2010»  քարոզարշավը:

Հիմնադրամը Վաշինգտոնում գործող «Երկրի օր» միջազգային ցանցի պաշտոնական գործընկերն է Հարավային Կովկասի տարածաշրջանում: Ինչպես ամեն տարի,  2010 թ.-ին ևս Հիմնադրամը կազմակերպում է Երկրի օրվան նվիրված մի շարք միջոցառումներ` որպես Երկրի օրվա 40-րդ տարեդարձին նվիրված համաշխարհային տոնակատարությունների մի մաս: «Երկրի օր» միջազգային ցանցը իր 40-րդ տարեդարձի տոնակատարությունների բոլոր մասնակիցներին կոչ է արել համախմբվել «Կանաչ սերունդ» կարգախոսի ներքո:

Հիմնադրամի կողմից իրականացվող «Երկրի օր- 2010» ծրագրի հիմնական նպատակը հասարակության տեղեկացվածության մակարդակի բարձրացումն է Հայաստանում գոյություն ունեցող շրջակա միջավայրի և բնապահպանական խնդիրների  շուրջ:

Հայաստանի մարզերում ապրիլ ամսվա սկզբից  անցկացվել են աղբահավաքի աշխատանքներ և ծառատունկեր ` հիմնադրամի աշխատակիցների, “Արևորդի” էկո- ակումբների սաների, կամավորների, ՀՀ-ում տարբեր դեսպանություննների, միջազգային և տեղական կառույցների աշխատակիցների մասնակցությամբ: Արդեն իսկ կայացել են ծառատունկեր Գառնի-Գողթում, Նորատուսում, Ուրցաձորում, Եղեգնաձորում, Վանաձորում, Երևանում:

 “Կանաչ սերունդ” քարոզարշավի շրջանակներում է նաև ՎիվաՍել-ՄՏՍ-ի աջակցությամբ ապրիլի 17-ին Վանաձորում մեկնարկած “Կանաչ դպրոց” ծրագիրը: Ծրագրի նպատակն է համախմբել  բազմաթիվ դպրոցականների` նրանց  հնարավորություն ընձեռելով  դրսևորվելու  որպես առողջ ապրելակերպի կողմնակից և նախաձեռնող սերունդ:  Մինչև հունիս Վանաձորի թիվ 10 դպրոցի   աշակերտները  պլաստիկ շշեր և օգտագործված թուղթ կհավաքեն տարբեր կառույցներից  և կհանձնեն “Արևորդի” էկո- ակումբին, որն էլ իր հերթին թափոնը կհանձնի վերամշակման ընկերություն:  Թափոնի դիմաց ստացված գումարով դպրոցը ձեռք կբերի տնկիներ` դպրոցի հարակից տարածքը  կանաչապատելու համար: Համեմատաբար մեծ քանակությամբ թափոն հավաքած աշակերտները կարժանանան  Հիմնադրամի և ՎիվաՍել-ՄՏՍ-ի տարբեր մրցանակներին: Ծրագրի ամփոփումը կկայանա հունիս ամսին:  Հիմնադրամը հույս ունի “Կանաչ Դպրոցը”  դարձնել շարունակական  ծրագիր` Հայաստանի տարբեր մարզերի դպրոցներին ևս մասնակցության հնարավորություն ընձեռելով:

Ապրիլի 17-ին Վանաձորի կենտրոնական հրապարակում կայացավ  ծառատունկ` ՀՀ-ում ԱՄՆ, Իտալիայի, Գերմանիայի  դեսպանությունների ներկայացուցիչների, Վանաձորի քաղաքապետի, Գերմանական տեխնիկական համագործակցության կազմակերպության (GTZ), Հիմնադրամի աշխատակազմի մասնակցությամբ:

“Կանաչ սերունդ” քարոզարշավը համագործակցության նոր եզրեր է հաստատում Վայրի բնության և մշակութային արժեքների պահպանման հիմնադրամի և Վանաձորի քաղաքապետարանի միջև. այսուհետ ոչ միայն շարունակական կդառնան հիմնադրամի բնապահպանական միջոցառումները Վանաձորում, այլև քաղաքապետարանի աջակցությամբ Վանաձորում կգործի “Արևորդի” էկո-ակումբը` քաղաքապետարանի տրամադրած  տարածքում:  

Քարոզարշավի շրջանակներում է նաև “Կանաչ Ավտոբուս” ծրագիրը: Այն յուրահատուկ շարժական կինոթատրոն- գրադարան է, որը, շրջելով անգամ  Հայաստանի ամենահեռավոր մարզերում,  բնակչությանը կտրամադրի էկոգրականություն, ինչպես նաև կցուցադրի բնապահպանական թեմաներով ֆիլմեր, կկազմակերպի քնարկումներ, սեմինարներ:  Ծրագրի իրականացմանը մեծապես աջակցում է  ՀՀ-ում ԱՄՆ դեսպանատունը:

Հայաստանում “Կանաչ սերունդ” քարոզարշավն ընթանում է նաև մեկ այլ հետաքրքիր ձևաչափով. մինչև մայիսի 15-ը մասնակցելով ՎիվաՍել-ՄՏՍ- ընկերության հետ համատեղ կազմակերպվող SMS ակցիային`  յուրաքանչյուր մասնակից  իր անվանական ծառը կնվիրաբերի ողջ Հայաստանով մեկ պարբերաբար անցկացվող  ծառատունկերին: “Տնկիր քո ծառը” խորագրով ակցիան  մեկնարկել է ապրիլի 1-ից, և հիմնադրամն արդեն ստացել է  հաղորդագրություններ` հարյուրավոր մասնակիցներից: Նվիրատուները հիմնադրամի կայքէջում կարող են տեսնել, թե որ մարզում է տնկված իրենց նվիրաբերած անվանական ծառը:  

 «Կանաչ սերունդ» քարոզարշավի առանձնահատուկ ծրագրերից մեկը թղթե տոպրակների օգտագործման խրախուսումն է. ՎիվաՍԵլ-ՄՏՍ-ի և Հիմնադրամի համատեղ ջանքերով արդեն Երևանի որոշ սուպերմարկետներում` մասնավորապես “Ֆրեշ”, “Սթար”, “Զովք”, այսօր արդեն բնության համար մեծ վտանգ հանդիսացող պոլիէթիլենային տոպրակների փոխարեն առաջարկվում է նոր` այլընտրանքային, առավելապես անվտանգ տարբերակ` թղթե տոպրակ: Հիմնադրամը ծրագրի շրջանակներն ընդլայնելու և շրջակա միջավայրի հանդեպ հանրության մեջ  պատասխանատու վերաբերմունք ձևավորելու նպատակով հետևողականորեն բանակցում է նաև  մի շարք այլ սուպերմարկետների հետ` թղթե տոպրակները մեր առօրյայում առավել հասանելի և կիրառելի դարձնելու համար:

 “Երկրի օրվա” շրջանակներում ապրիլի 30-ին  ՎիվաՍել-ՄՏՍ-ի աջակցությամբ կկայանա նաև երեխաների` «Ջուր» թեմայով լուսանկարների մրցույթ  ՎիվաՍել-ՄՏՍ-ի գրասենյակում (Ամիրյան 3 հասցեում):